تبقى قاعد في امان الله مع مراتك وقاعدين تهرجوا تقولها بحبك يا توته وتقولك وانا ..... وفجأه يدق الباب
هو : خير الله اما يجعله خير من اللي جاي لنا الساعه ديه
هي: مش عارفه قوم افتح يا حبيبي
هو : ربنا يستر
ويروح يفتح الباب وللاسف ربنا ما استجبش لدعوته يلاقي في وشه حماته
هو: ( في سره اعوذ بالله من الشيطان الرجيم ) حماتي
حماته : ايوه امال عفريتها جاي يطل عليك ايه كل ده علشان تفتحوا الباب انت وقعت على ودنك ولا ايه
هو: في سره ( يا رب الناس كبيره وصغيره بتموت وحماتي اللي خلاص العنكبوت عشش في مناخيرها لسه عايشه افتكرها يا كريم )
حماته : سرحان في ايه بقى يا راجل يا ناقص اكلمك في التليفون وافولك تعالى بتخانق مع المعلم عكوة الجزار تقوم متجييش
هو : طب ما انا افتكرت ان ولادك اكيد هناك يا حماتي
حماته : ليه هو انا مستغنيه عنهم
هو : يعنى ايه مستغنيه عنى انا وبعدين ده راجل مفترى اخر مرة كان اتخانق مع جاركو اسماعيل الله يرحمه وفضل معلقه في المحل تلات ايام
حماته : انت لو اتهببت مت هالاقي بدالك ميت عريس لبنتي اللي اتعمت لما خدتك
واقولها يا بنتي بصيله تقولي بحبه ياماما يابنتي بصي كويس تقولي بحبه
اقولها دققي في ملامحه تقولي الموكوسه مالها ياماما اجيبلها صورة قرد وقولها بصي للصورة وبصي له
ايه يفرقهم ترد عليا تقولي بحبه ياماما وادي النتيجه اتجوزتك وعملت عمليه ليزر في عنيها ورجعت تشوف كويس ولما فاقت شافتك اتخضت واصرت ان الدكتور يرجعلها نظرها زي ما كان .
هو : كتر خيرك يا حماتي ( في سره يارب مش عايز غير الدعوه ديه وبس خدها خليها تبلع لسانها اكيد هتتسم )
حماته: بنتي حبيبتي معلش نسيت اسلم عليكي اما لاقيت الموكوس في وشي
هي : نورتي يا ماما يا حبيبتي عامله ايه
حماته : كويسه بس الراجل اللي اتعميتي واتجوزتيه رفعلي الضغط
هو : معلش يا حماتي معلش
حماته : وبعدين ايه اللي انت لابسه ده شورت وفانله امال فين الكاب انت فاكر نفسم شغال في سيرك
ولا كنت بتسليها وبتعملها فقرة المشي على الحبل طب هو انا غريبه اعملنا عجين الفلاحه ادخل غير واتحشم ، وبعدين جيب لي حاجه اشربها يا عديم الذوق يالا .
هو يدخل المطبخ ويعملها شاي ويبص لعلبة سم الفيران ويقول اخلص منها واخلص نفسي بعدين يرجع ويقول حرام هاروح من ربنا فين
يرد على نفسه ويقول اكيد ربنا هيسامحني لأ لأ اعوذ بالله من الشيطان بلاش ) ويخرج
حمانه : كل ده علشان كوباية شاي موكوس ومدهول يا حظك يا بنتي وتدوق الشاي ايه ده الشاي طعمه زفت ادخل اعملي واحده عدله يالا
هو : من عنيا يا حماتي (وهو يبتسم مش خسارة فيها العلبه كلها )
ويدخل المطبخ ويمسك السم بعد كده يرجع في كلامه ويرجع الاوضه تاني
حماته : وريني ظبطته ولا حتى في ديه مش عارف
هو : ظبطته يا حماتي بس انتي مقولتليش انتي جايه ليه
حماته : الله بيت بنتي اجيه وقت ما انا عايزه حكم
هو : طبعا يا حماتي تنوري بس متهيألي فيه سبب
حماته : عرفت ان بنتي حامل قلت اجي اقعد معاها لغاية ماربنا ينتعها بالسلامه
هي : بجد يا ماما
حماته : اه يا حبيبة ماما هاقعد معاكي وهانام انا وانتي في اوضه واحده فاهمه
هو : يا نهار اسود ديه لسه في الشهر الاول يا حماتي
حماته : وكمان بتسود النهار انا قلتها كلمه ربنا يسامحه ابوها اقوله نناسب ده يرد عليا ويقولي معلش ماهي خلقه ربنا
هو: يبص لنفسه في المرايا يعنى ايه انتي مجوزاها لقرد
حماته : اسخن على الاقل القرد كان هيقعد يتنططلها و يسليها مش زيك
هو: بقه ديه اخرتها يا حماتي عايزاني اقعد اتنطط لها
حماته : وفيها ايه مش مراتك حبيبتك لو انت معملتهاش قرد مين اللي هيعمل لها
هو: في سره حسبي الله ونعم الوكيل فيكي يا انثى العنكبوت
حماته : وبعدين في موضوع مهم عايزه اكلمك فيه
هو : خير
حماته : انت عارف طبعا انها حامل
هو : ايوه
حماته:وعارف انها اكيد هتتوحم يبقى لغاية ما الوحم يخلص ماشوفكش قدامي
هو: ليه يعني
حماته : حرام عليك الواد ولا البنت يطلعوا شبهك ده لو حصل افطسهم ارحملهم
هو: حرام عليكي امال اروح فين
حماته : انت طالما هتقعد معانا يبقى تتلثم تخبي وشك العكر
هو: اتلثم يا شيخه حرام عليكي
حماته : حرام عليك انت ولادك
بصراحه انا جالي في المنام المرحوم ابوكي
وكان لابس شورت ابيض وفانله حمالات مقطعه معفن عادي متغيرش المهم قالي خلي بالك من اللي في بطن بنتك
اوعي تخليها تبص لبوز الأخص جوزها لغايه ما تخلف وصيتك اللي في بطنها
وفجأة طلع يجري والناس وراه بتقول حرامييي
هو: لابس شورت ابيض وفانله مقطعه ؟؟؟؟؟؟؟؟
حتى جهنم رايح يشحت فيها
حماته : اخرس هي وصيه وهانفذها ودي وشك الناحية التانيه يا اخي
هو: في سره هي ايه محسساني انها بتكلم قرد هي متشوفش نفسها في المرايه لما امها كانت تحب تخوفها كانت تخليها تبص في المرايا وتقولها العوا اهو
حماته : وانتي يا بنتي ولا تكلميه ولا تردي عليه زيه زي اي كرسي في الشقه فاهمة
هي: بس يا ماما
حماته : مفيش بس
هو : في سره كده يا حماتي طب اصبري عليا هاخليكي تموتي موته محدش ماتها قبل كده اخليكي تموتي بفضيحه
ان ما كهربتلك قاعدة الحمام يا انثى العنكبوت
موضوع: حوار زوج مع حماته 
السبت 25 أكتوبر - 13:08
