"رئيس من شبرا"...الجزء الأول

السلام عليكم ورحمة الله وبركاته
أتمني ان القصة تعجبكوا وماتنسوش وصيتي لو غبت عن المنتدي كتير ابقوا اسألوا عليا
وربنا يستر
*****************

زكية: يللا ياحسني ..قوم بقي حتتأخر عالشغل
حسني: نيووووووووووواه.. صباح الخير يازكية..الفطار جاهز؟؟
زكية: صبح الصباح فتاح ياعليم..والبيت مافهشي ولا مليم ..مين في ال........
حسني: خلاص يا زكية انتي حتغنهالي؟! نسيت ان مفيش ولا مليم في البيت عشان نجيب فطار
زكية: والديك بيدّن كوكوكوكوووووووو في البدرية.. يللا ..........
حسني: قلت خلاص ..وبعدين انتي حتكاكي ؟!..يللا ان شاء الله يجيلك انفلونزا الطيور ونخلص ..خلاص اعمليلي كوباية شاي
زكية:عايزة اقوللك يابعلي ياحبيبي ان الأنبوبة فضيت
حسني: فضيت؟؟!..أنا مش لسة جايبها أول امبارح؟؟
زكية: ياأستاذ حسني انت جبتلي الأنبوبة نصها فاضي
حسني: أيوة فعلا ..وأنا أقول كانت خفيفة كدة ليه؟؟..منّه لله اللي باعهالي.. يافتاح ياعليم ..أنا صبحت بوش مين بس؟؟؟
زكية:
حسني: ربنا يخليكي ليا يا مراتي ياحبيبتي
زكية: خد دي بقي اخر حاجة عشان تروح الشغل مبسوط.. ماما جاية النهاردة
حسني: حماتي؟؟ ..جاية تعمل ايه ان شاء الله ماحنا ماعندناش أكل؟؟.. خلاص قوليلي صح ايه أخبار البامية اللي في التلاجة حمضت ولا لسة؟؟..لو كانت حمضت مش حنلاقي أغلي من حماتي عشان تاكلها..وبالهنا و الشفا
***************
حسني: يازكية شوفي مين اللي بيخبط
زكية: حاضر..حاضر......أيوة يا حضرت..خير؟؟
- مييييييييييييييييييييييييية
زكية: والله ماكانش يتعز ياخويا احنا بقالنا يومين ماعندناش مية ممكن تشوف عند عم أمين جارنا اللي فوقينا
- ياست أنا مش عايز مية..أنا بقوللك مية..فاتورة المية.....اتفضلي الوصل
زكية: ياخبر؟؟..17 جنيه ليه؟؟.. ده حتي المية مقطوعة ..الحقني يا حسني
حسني: 17 جنيه؟؟! ...طب ممكن تستني عليا للشهر الجديد لحسن البيت مافهشي ولا مليم..غنيهاله يازكية وأمرنا لله

عم أمين: السلام عليكم..ايه خير ياجماعة..فيه ايه؟
حسني: لا أبدا ياعم أمين دي فاتورة المية جاتلنا 17 جنيه بحالهم
عم أمين: خلاص ولايهمك الجيران لبعضيها..اتفضل ياأستاذ ادي 20 جنيه والباقي حلال عليك
زكية: يوووووه..مايصحش ياعم أمين..برده كدة؟؟
حسني: مش عارف نرد جمايلك دي ازاي يا عم أمين
عم أمين: ماتقولوش كدة دي حاجة بسيطة..أنا نازل يلزمكمش حاجة من برة؟
زكية: كتر ألف خيرك..كنا بس عايزين...
حسني: لا لا عايزين سلامتك اتفضل اتفضل..

زكية: أنا متغاظة ياحسني من بتاع المية ده
حسني: فعلا الفاتورة عالية قوي
زكية: أنا مش عالفاتورة..يابخته أخد تلاتة جنيه بحالهم باقي الوصل.. أنا بنق عليه
**************
الضابط: يافندم احنا عملنا كل التحريات عنه..مفيش غيره اللي بيحرض التلاميذ انهم يعملوا مظاهرات..واضح انه مش سهل يافندم
- وعرفته عنه ايه؟؟
الضابط: هو ساكن في حي قديم في شبرا..مدرس ألعاب..يعني موظف عادي وأكيد طبعا مش عاجبه النظام وعايز يعمل انقلاب ضده..يعني عشان المرتبات ..والله يافندم الشعب بيتدلع
- عالعموم هاتوه عشان نستجوبه علي طريقتنا ..طبعا انت فاهمني..عايزين نعامله بكلللللللللللل احترام ..ده مهما كان مدرس محترم ..انت قلتلي اسمه ايه؟؟؟
*************
أم زكية: مين اللي بيخبط كدة؟؟....أيوة نعم بتخبط كدة ليه؟؟ ما تنطق؟؟ ماله ده ياخواتي مابينطقش
- ايه ياست اديني فرصة أتكلم ..أنا بتاع النور..50 جنيه
حسني: فيه ايه ياحماتي؟؟....ايه ده انتوا ماوراكوش غيري النهاردة؟؟..وريني ياحماتي الوصل..كااااااام؟؟!!..ليه 50؟؟ ده النور بيقطع عندنا أكتر مابييجي !!...منورة يا حماتي
- وياريت عايزين عليهم خمسة جنيه زبالة
حسني: زبالة؟؟.. الزبالة دي للناس اللي بتاكل وبيتبقي عندها أكل فبترميه..احنا بقي ماعندناش أكل أصلا.. وبعدين أنا شايف ان من ساعة مابندفع للزبالة ...الزبالة كترت في الشوارع ..انتوا بتاخدوا الفلوس عشان تدعموها؟؟!

عم أمين: يارب ياقوي..السلام عليكم..ايه ياجماعة مالكوا؟؟
أم زكية: الحقنا ياعم أمين..قال ايه ياخويا فاتورة النور جاية 50 جنيه!
عم أمين: خلاص ياجماعة ولا يهمكوا الجيران لبعضيها..اتفضل ياأستاذ الفلوس
حسني: لأ ده كتير بجد يا عم أمين..بس أنا أوعدك اني أردلك الفلوس دي أول ماأقبض..بس أنا عندي طلب أخير..ممكن بس تستني شوية لان أكيد بتاع التليفونات جاي في السكة
*************
حسني: أنا نازل بقي يازكية عايزة حاجة؟.. وحتي لو عوزتي مش حجيب حاجة طبعا
زكية: ترجعلي بالسلامة..من شر النفاثات في العقد ..ومن شر حاسد اذا حسد
حسني: يعني حتحسد علي ايه يعني؟؟
زكية: ليه يعني..دانت مدرس ألعاب اد الدنيا
حسني: اااااااههههههااااااه.....مدرس ألعاب في مدرسة مافهاش حوش
زكية: ماانا قلتلك ميت مرة انك تدي دروس
حسني: حدي دروس في الألعاب؟؟..هي الناس لاقية تأكّل عيالها عشان تعلمهم
زكية: لهو انت ياخويا امتي حتاخد البتاع ده اللي اسمه الشادر؟؟
حسني: شادر؟؟..ااااه قصدك الكادر..ااه موت يا ....... دول بينيمونا بس ياحبيبتي
ادعيلي انتي بس اقدر أزوّغ من المعلم جلجل الجزار وعم شكري البقال وصاحب البيت عشان الفلوس اللي عليا

ايه ده ؟؟أنا مش عارف ايه حكاية الباب اليومين دول ابقي فكريني يازكية نشيله أريحلنا
- افتح الباب .........بوليس
حسني: بوليس؟؟!!...أهلا ياباشا اتفضل..خير ان شاء الله؟؟؟
الضابط: انت المدعو حسني.. مدرس الألعاب؟
حسني: أيوة ياباشا أنا حسني
الضابط: أمن دولة ..هاتوووووووووووه
حسني: ليه بس ياباشا أنا عملت ايه؟
الضابط: انت متهم بانك بتحرض التلاميذ انهم يعملوا مظاهرات ضد النظام..وبيقولوا انك الريس بتاعهم ..وغير كدة اسمك نفسه مشكلة
حسني: ليه ماله اسمي بس؟؟
الضابط: انت مش اسمك بالكامل (محمد حسني مبارك) علي اسم ريسنا ؟؟؟...ربنا يطوّلنا في عمره
حسني: والله أنا كنت عايز أغّيره من زمان ياباشا ده جايبلي المشاكل في كل حتة
الضابط: كمان بتغلط في اسم الريس...هاتووووه
زكية: واخدينه علي فين؟؟؟.....يابعلييييييييييييييييييييييييييييي
حسني:أانا والله ماعملت حاجة.. اتصلي بمحامي العيلة يازكية بدل مانتي عمّالة تسوطي..ماتخافيش مش حتأخر عليكي مدام تبع أمن الدولة يعني ماتقلقيش خاااااالص
أم زكية: هو انت عندك عيلة عشان يبقي عندك محامي جتك نيلة
حسني:والله انتي منورة ياحماتي...الله يسامحك يابا..انت اللي عملت فيا كدة..حبك تسمّيني الاسم ده..

على فكره
فكره القصه ظريفه جدا
وكمان اسلوب الحوار بين الطرفين اكتر من رائع
تحس انه فعلا حاجه دايما بتحصل فى حياتنا وخاصه انها من الفاظ الحياه
مستنى ايه اللى هيحصل فى الجزء التانى ؟؟؟؟؟؟؟

ان شاء الله
معلش انا بس مكسل بسبب ظروف الكليه
والسكاشن والخرسانات والتنكات والطرق
بس اول مااشم نفسى
باذن الله هيكون فى قصه فعلا اتمنى انها تعجبك
بس اعذورنى فعلا بسبب ظروف بكالوريس

ااسف فى البدايه لتأخرى فى الرد وذلك لأسباب قهريه دون الدراسه طبعا
بخصوص القصه فهى رائعه وما شاء الله بها قدر كبير من خفة الدم اللى أكيد
بتعكس صورة كاتبتها وكمان التسلسل المنطقى للأحداث كويس جدا رغم
إنى مفيش حد دلوقتى بيدى حاجه لله زى عم أمين.

اقتباس :

زكية: خد دي بقي اخر حاجة عشان تروح الشغل مبسوط.. ماما جاية النهاردة

حتة خد دى بقى أنا إفتكرتها بوسه مثلا وطلعت مصيبه أو على طريقة خد صلح السخان
جميله جدا وعجبتنى لأن قلب المتوقع أو التطرق لشى تانى غير اللى هيحصل بطريقه
ذكيه ده شىء بأحبه وأفضله دايما.

اقتباس :

عم أمين: يارب ياقوي..السلام عليكم..ايه ياجماعة مالكوا؟؟

عم أمين مش هيقول يا رب يا قوى إنما هيقول يا رب يا ساتر ودى الطبيعيه لأن عم أمين
غلبان وميعرفش فتوى إن كلمة يا ساتر لا تصلح ويجب أن نقول يا ستير لذلك عم أمين
واللى ساكن فى شبرا هيقول يا رب يا ساتر ويا ريت دايما تجيبى الشخصيه كما هي
ومتحاولش تقوميها خليها زى ما ها كده وبعدين نبقى نقوم إحنا.

أخيرا عنوان القصه جميل بس أعتقد إنى فى أسوان أماكن كتيييير تشبه شبرا بل أكثر
شعبيه من شبرا لذلك فى المرات القادمه لا تنظرى للخارج وتعنونى القصه أو عملك
الأدبى لخارج بلد بمعنى إنى رئيس من أسوان أو من الحكروب أو أى منطقه من دول
مش هيعيب القصه أو يجعل قيمتها أقل.

وشكرا ليكى مره تانيه ومنتظرين البقيه ويا ريت تحددلنا أوقات بقى مش علطول كده
مفاجآت ولا أيه؟!!!

حلوةةةةةةةةةةةةةةةةة قوىىىىىىىىىىىىىىىىىىىىىىىىى





محامى العيلة