انني لا اكذب ولكني اتجمل

اول شي الموضوع ده في قسم علي المصطبه
يعني يا ريت اللي يرد يرد بالعاميه
عشان احنا عاوزين ندردش مش عاوزين منشتات
المهم في حاجة بصراحة غريبه
في ناس اعرفهم كويس علي المنتدي واحنا اصحاب قبل المنتدي
بس للاسف لما تقرأ رد حد علي اي موضوع
اما يحاول يفهمك الموضوع من وجهة نظر المجتمع او من وجهة نظر محمد صبحي
اما يكون مثالي جدا مع العلم انه مش كده خالص في الحقيقة
يعني يظهر كانه ماسك السبحة وسجادة الصلاه علطول معاه
مع انه بصراحة ..( تييت )..
وواحد تاني يظهر كانه عنتر اللي شايل سيفة يعني يدافع عن وجهة نظر
هو في الاساس مش ماشي بيها
بس لزوم الحبشتكنات
انا بردة مرات الواحد بيحاول يطلع مثالي بس مش لدرجة
انه يتقمص شخصية مش شخصيتة
فانا بصراحة بدعوا كل واحد في المنتدي انه يظهر علي طبيعتة
وكل واحد فينا في عيوب وطبعا في مميزات
فكلنا نحاول نظهر مميزاتنا ونصلح عيوبنا
بس مش نكدب علي نفسنا ومنخدش بالنا منها
او حتي نحاول نخفيها
ده حتي لما حد يسال انت تعرف فلان يقولة اه
يقوله اتكلمت معاها يقوله لا
يقوله يبقي متعرفهوش
انا بصراحة اتفجات لما شوفت ناس السنة دي
كنت حاطط صورة معينة ليهم عن طريق مواضيعهم وردودهم
بس للاسف طلع كلة شغل سينما
وفي الاخير يا ريت تبقي حياتنا كلها متناسقة
مش نعمل زي اللي بيقولوا دي نقرة ودي نقرة تانية

انا طولت عليكم كتير معلش
وعليكم السلام

فعلا والله ياكينج
انا لاحظت الحكايه دي فى المنتدي هنا بالذات
بس ده مش يمنع ان فى ناس فعلا
انا اعجبت بشخصيتها من المنتدي
ولاقيتها كده فعلا فى الحقيقه
مش معنى ان شخص او اتنين او خمسه
بيلبسوا قناع
يبقى كلهم باقنعه
وتسلم ايديك على الموضوع اللى اكتر من الرائع ده

فعلا دة بيحصل في المنتدي

او معظم المنتديات عموما

ودة شيء عادي

بس انت يا بشمهندس احمد اللي خلاك تحس بكدة

او تنقضه انك عارف معظم اعضاء المنتدي

فبتقارن كل رد بالشخصية اللي قالته

لكن لو حطيت نفسك في منتدي انت متعرفش حد فيه خالص

فانت مش هتحس بالموضوع دة خالص

وعالعموم جو النت دة ممكن يلغي شخصية الانسان خالص

ولو عايز يتقمص اي شخصية تانية فبيتقمصها الشخص بسهولة

لانو بكل بساطة محدش شايفوا ولا حد عارف انو بيكدب

والحل

اننا نتعامل عادي مع الشخصيات دي واللي اسمحلي اسميها مريضة نفسيا

لان بيحاول يغطي عيوب ظاهرة في شخصيته

ولو احترمنا حد من الشخصيات دي

فاحنا مش مطالبين اننا نصدقه

والمفروض علينا فعلا اننا منصدقش اي حد من خلال اي تعامل علي النت

انا عن نفسي مبعترفش بخبرة الانسان للتاني عن طريق المنتدي

لان زي مانت قولت في الاول

تعرف فلان

يقولة اه
يقوله اتكلمت معاها يقوله لا
يقوله يبقي متعرفهوش

انا كنت داخلة علي اساس اني قريت الموضوع قبل كده
لان عنوانه شوفته قبل كده في احد المنتديات
بس عجبني الموضوع لما لاقيته جديد

بصراحة انا ما لاحظتش النوعية دي من الناس
يمكن لان اللي اعرفهم في المنتدى .. معظمهم أعرفهم في الحقيقة من قبل المنتدى
واللي عرفتهم جديد في المنتدى .. ما زلت ما اعرفهمش في الواقع او ما اتعاملتش معاهم

بس عموما أكيد فيه ناس كده
واسمع من ناس كتير انهم اتصدموا لما شافوا ناس تانية علي الواقع
يمكن مش في منتدانا .. بس بتحصل

وانا عن نفسي بقدر الاقي مبررات لأي تصرف بيحصل من أي حد
لان كل بني آدم خطّاء
يعني ممكن يكون الواحد لابس قناع في النت .. غير الحقيقة
بس يمكن يكون القناع ده .. هو اللي مش قادر يعمله في الواقع
فبيعيشه في شخصية تانية

يمكن الموضوع فيه شوية علم نفس - اللي انا ما اعرفوش -
بس اعتقد ان ممكن تكون الفكرة دي صح

موضوع جميل بشمهندس وأنت جيت على الجرح زى مبيقولوا!!!
بس إن شاء الله هفنطلك الحكايه ومن أولها علشان خاطر عيونك وعلشان
متتفاجأش لما تلقانى أنا وغيرى يعنى.
شوف يا بشمهندس
مجتمع المنتدى هنا بيتعامل من منطلق الإحترام والأدب والأخلاق لأن غير كده ممنوع
أصلا يعنى لا مؤخذه لو أنت إنسان مش كويس مش هتقدر تمشى بالطريقه دى
معانا لأن فيه ضوابط ورابط وقوانين تمنع الخروج عن المسموح حتى الرأى
لو كان صح وبيجرح شخصيه هامه بيبقى ممنوع وده علشان العمليه متبقاش
طبيخ فى بعضيها والناس تجرح على أساس إنهم صرحاء ولكن الديمقراطيه
دى بصراحه متنفعش وتعتبر زائفه وممكن نحطلها كمان بند إنها قلة أدب.

إنما أنت فى الواقع بتتعامل فى الدنيا اللى مستحيل هتبقى مثاليه ومستحيل هتتلون
فيها بلون مش بتاعك وهتتكلم كلام أنت المسؤل عنه وأنت حر تقوله أو لأ لأنك
مش ضمن منظومه زى المنتدى هتأذى ناس يعنى لو بقيت صريح أو على الأقل
أصبحت نفسك اللى هيا من الطبيعى تجرح فى الناس أو تقول صراحه جامده.

بالمعنى البسيط لو داخل مكان محترم وإنت إنسان "آسف فى اللفظ" عكس ذلك
هتجبر إنك تتعامل كويس وتتفاهم بالذوق والرأى والرأى الآخر وتاخد وتدى
فى قلب الكلام إنما بره فى الشارع أو فى المحافل الأخرى ممكن تتكلم براحتك
ومحدش يقدر يعقب عليك ولا يقولك بتقول إيه لذلك يقال ده فى الشارع
وده فى مكان عام والمنتدى هنا مكان عام مينفعش نخشه من غير الملابس
الرسميه زى الكليه بالظبط مينفعش تروح بشبشب بصباع"رغم إنى ناس فعلا
بتروح بيه" أو بجلابيه أو مش نضيف مثلا لازم يعنى تبقى متناسب مع
البشر التانين إنما بره هتبقى على طبيعتك لأنى مفيش رابط ولا ضابط ولا حدش
هيقولك أنت مين ولا بتعمل كده ليه.

لذلك اللى عاوز أوصله إنى فيه فرق بين المنتدى والواقع والمكان العام والمكان اللى
مش عام"الشارع يعنى".

وشكرا لطرحك للموضوع
تقبله بوافر من الإحترام
والله الموفق

الموضوع فعلاً مهم جداً ويشغل اهتمام الكثيرين وانا كنت من هؤلاء الذين يتسألون لماذا يكون سلوك الاشخاص علي النت مغاير لسلوكهم علي ارض الواقع
ولقد اعجبني جداً تفسير البشمهندس الحبار لهذه الظاهره لانه الحقيقه لم يكن من ضمن تفسيراتي لها
فانا كنت اري ان النت هو بمثابة المرايا ولكنها ليست مرايا عاديه تعرض لنا صورتنا ولكنها تعرض لنا الصوره التي نحب ونتمني ان نكون عليها
ويجب ان نلاحظ ايضاً اننا حين نتحدث علي النت فنحن نملك حق مراجعة ما نقول وتنقيحه وتصحيحه حتي يخرج بالصورة التي نحب له ان يخرج عليها
ولكن في الواقع نحن لا نملك مثل هذه الفرصه فالكلام يخرج من فمنا مباشرة الي اذن السامع دون ان نتستطيع ان نوقفه في منتصف الطريق لنصحح ما به من اخطاء فيخرج وهو يحتوي علي ما يمكن ان يؤلم الاخرين وما يمكن ان يجرح مشاعرهم وما يمكن ان يعطي انطباعاً سيئاً عنا لدي الاخرين
واهمس في اذنك يا بشمهندس بنصيحه
لماذا تفترض في من تعرفهم من الاعضاء وتجد في شخصيتهم الواقعيه اختلاف عن شخصيتهم في المنتدي ان الاصل هو الشخصيه الواقعيه ؟؟؟؟
لماذا لا تكون شخصيته علي صفحات المنتدي هي الشخصيه الحقيقيه له والتي تمنعه ظروف الحياه من اظهارها علي ارض الواقع ؟؟؟؟؟؟؟
الن يكون ذلك التصور اجمل وانفع في علاقتك بهم
اتمني دائماً ان نحسن الظن بالناس حتي يكون الناس عند حسن ظننا بهم
وشكراً جزيلاً لطرحك هذا الموضوع

الظاهره دي فعلا بتحصل كتير و يمكن ف جميع المنتديات

فبقت الحكايه عادي يعني ومحدش بيهتم بيها

بس برضو يا احمد باشا صوابعك مش زي بعضها

يعني فعلا هتلاقي ناس بالنوع ده

بس مش كله

ويمكن كمان تلاقي ناس بتتجمل علي المنتدي

وبتتجمل قدامك انت بس

بس بعد كده بيظهر الوش التاني

الخلاصه يعني ان ايلي بيعمل كده ولا بيستفيد ولا بيعملوا مظهر زي ما هو فاكر

بالعكس

ده كده بياذي نفسه لأنه ممكن يحط نفسه علي أول طريق مرض انفصام الشخصيه

انني لا اكذب ولكني اتجمل 2696

يا بشمهندس احمد علي الموضوع

» عفواً .. أنا لا أكذب ولكني أتجمل !!
» أحببت وكرهت.. فرحت فحزنت... ولكني . رغم كل الألم .. عشت
» تحت المطر امشي ابكي ولكني اقوي البشر ..........