كلام في السياسة بقلم (صلاح جاهين)

أوقات أحس كأني على مفرق طريق
احتار و يصبح قلبي في الأفكار غريق
و لما أشور الجيران
أشاور الخلان

رأي الصواب يظهر جريء له بريق
و أحس رأي حبايبي بينور عينيا
سموا الشعور ده حب ولا ديموقراطيه
ماليش كتير في السياسة

بيني و بين أيامي حرب ما تنتهيش
و زي كل الناس باموت علشان أعيش
أتمنى أروح عندهم
جهدي على جهدهم

يصبح وجودنا قوة بعد ما كان مفيش
و أنا إيش أكون وحدي لولاش بلدي عليا
سموا الشعور ده حب و لا تعاونيه
ماليش كتير في السياسة
أنا قلبي مليان حماسة
لكل شيء حر صادق
ماليش كتير في السياسة
لكن بحب المبادىء
و باحب صاحب المبادىء

صلاح جاهين

» لحن الحب
» على اسم مصر ؛؛ قصيدة لعم الشعراء صلاح جاهين؛؛؛؛؛؛؛؛؛؛
» محاكاة رباعيات صلاح جاهين لعصام قمر
» معنى السياسة
» صراع الحضارات .... وكلام في السياسة !!!!