البِتَـــــــــ ــاع

البِتَـــــــــ ــاع

ياللي فتحت البتاع

فتحك على مقفول

لأن أصل البتاع

واصل على موصول

فأيّ شئ في البتاع

الناس تشوف على طول

والناس تموت في البتاع

فيبقي مين مسؤول ؟

وإزاي حتفتح بتاع

في وسط ناس بتقول

بأن هذا البتاع

جاب الخراب مشمول

لأنه حتة بتاع

جاهل

غبي

مخبول

أمر بفتح البتاع

لأنه

كان مسطول

!

*
*
*
*
*
*
*

وبعد فتح البتاع

جابوا الهوا المنقول

نكش عشوش البتاع

وهد كل أصول

وفات في غيط البتاع

قام سمم المحصول

وخلا لون البتاع

أصفر

حزين

مهزول

!

*
*
*
*
*
*
*

وساد قانون البتاع

ولا عله ولا معلول

فالقاضي تبع البتاع

فالحق ع المقتول

والجهل زاد في البتاع

ولا مقري

ولا منقول

والخوف

سرح في البتاع

خلا الديابه تصول

ويبقي البتاع في البتاع

والناس صايبها ذهول

وإن حد قال دا البتاع

يقولوا له مش معقول

!

*
*
*
*
*
*
*

وناس تعيش بالبتاع

وناس تموت بالفول

وناس تنام ع البتاع

وناس تنام كشكول

آدي اللي جابه البتاع

جاب الخراب بالطول

لأنه حتة بتاع

مخلب

لراس الغول

باع البتاع بالمتاع

وعشان يعيش على طول

عين حرس بالبتاع

وبرضه مات مقتول!

-أحمـد فــؤاد نجـم-

بشمهندس/ القبطان على الاختيار الموفق دوما يصفق

احمد فؤاد نجم انسان لذيذ اووووي
وبيخبط ف اي حد ومش بيهمه

ميرسي يا قبطان

عادى شىء متوقع منك
شكرا ياقبطان

جامد البتاع دا جدا جدا جدا

وطلع بتاع ابن بتاع كمان

شكرا يا قبطان عالبتاع

وتسلم ايدك

شكرا يا قبطان على البتاع
وأدى مقطع أحمد فؤاد نجم وهو بيلقى
قصيدته على دريم

شكرا عالبتاع

للعلم ... البتاع هنا (الانفتاح الاقتصادي) والذي كان في عصر الرئيس السادات ...
وكانت هذه القصيده بعد اثار و نتائج الانفتاح ...

وكانت اول قصيده علنيه ... لمهاجمه الرئيس السادات بعد موته وقال (وبرضه مات مقتول)

شكرا يا قبطان على البتاع و فعلا أحمد فؤاد نجم انسان جرئ جدا وكلامه جميل